ШУТИС-ийн харьяа Ерөнхий боловсролын ахлах сургууль нь жил бүр Тэрэлж дэх ШУТИС-ийн полигонд байрлах дадлагын байрандаа зун, намрын эрчимжүүлсэн сургалтыг зохион байгуулдаг уламжлалтай. Энэхүү үр дүнд суурилсан эрчимжүүлсэн сургалтын зорилго нь суралцагчид танхимаар судалсан шинжлэх ухааны мэдлэгээ хэрэглээ болгох, боловсруулах, асуудал шийдвэрлэх, аливаад шинжлэх ухааны хэл, арга, сэтгэлгээгээр хандах, мөн цаашид суралцахад шаардлагатай  мэдлэг, чадвар, дадал эзэмшүүлэх, тэдний чөлөөт цагийг үр дүнтэй өнгөрүүлэх, бүтээлч сэтгэлгээг хөгжүүлэхэд оршдог.

“Ковид цар тахал”-ын улмаас сүүлийн хоёр жил ахлах сургуулийн суралцагчид хээрийн эрчимжүүлсэн сургалтанд хамрагдаж чадаагүй юм. Энэ хичээлийн жилээс эрчимжүүлсэн сургалтаа зохион байгуулахаар төлөвлөсөн бөгөөд 12-р ангийн 3 бүлгийн суралцагчдыг дадлагын байртай танилцуулах аялалыг 2022 оны 4-р сарын 23-ны өдөр анги удирдсан багш нар зохион байгууллаа.

Төгсөх ангийн суралцагчдыг эрчимжүүлсэн сургалтын байртай танилцуулахаас гадна тэдний эрүүл мэнд, бие бялдрыг дэмжих зорилгоор спортын олон төрөлт тэмцээнүүдийг зохион байгуулав. Үүнд:

1. 3х3 сагсан бөмбөгийн тэмцээн \Анги бүрээс 2 баг тамирчид оролцоно\
2. Хөгжөөнт буухиа тэмцээн /Анги бүрээс 12 тамирчин оролцоно/
3. Үндэсний бөхийн барилдаан \Анги бүрээс 2 тамирчин оролцоно\
4. “Байгалд ээлтэй хамт олон” шалгаруулах тэмцээн /Анги хамт олноороо оролцоно/

Тэмцээний шилдгүүдээр:

• 3х3 сагсан бөмбөгийн тэмцээнд 12а ангийн баг тамирчид тэргүүн байр эзэлж “Үнэ цэнэтэй тоглогч”-оор 12а ангийн сурагч А.Сугарсайхан шалгарав.
• Хөгжөөнт буухиа тэмцээнд 12в ангийн баг тамирчид тэргүүн байранд шалгарлаа.
• Үндэсний бөхийн барилдаанд 12а ангийн сурагч Б.Энхжин түрүүлж, 12в ангийн сурагч Б.Баярхүү үзүүрлэлээ.
• “Байгалд ээлтэй хамт олон” шалгаруулах тэмцээний тэргүүн байранд 12в анги, дэд байранд 12а анги, гутгаар байранд 12б ангийн хамт олон тус тус шалгарч өргөмжлөлөөр шагнагдав.

“Байгалд ээлтэй хамт олон” шалгаруулах тэмцээний зорилго нь эко аялах, байгальд ээлтэй зөв дадал зуршилд суралцах, байгаль орчноо хайрлан хамгаалах, цаасны хэрэглээг бууруулах, хог хаягдлыг эх үүсвэр дээр нь ангилан хаях аргад суралцуулахад оршино.   

Иймд Тэрэлж дэх ШУТИС-ийн полигоны эргэн тойрны 100-200 метр газарт мод, гол горхи, гуу жалга орчмыг бохирдуулсан ус ундааны сав, гялгар уут, цаас, хагарсан шил зэргийг түүж цэвэрлэн ангилан ялгаж хог хаягдлын төвлөрсөн цэгт хүргэлээ. 

Төгсөх ангийн суралцагчиддаа сурлагын өндөр амжилт хүсье.

ШУТИС-ИЙН ХАРЬЯА ЕРӨНХИЙ БОЛОВСРОЛЫН

АХЛАХ СУРГУУЛИЙН ЗАХИРГАА