ШУТИС-ийн харьяа ЕБАС нь суралцагчдын хөгжил, хүмүүжил хүмүүнлэгийн хөтөлбөрийн хүрээнд 2022 оны 3-р сарын 11-ны өдөр СБД-ийн гэр бүл хүүхэд залуучуудын хөгжлийн хэлтэс, Отгонтэнгэр их сургуулийн Хуульзүйн сургууль, СБД-ийн цагдаагийн нэгдүгээр хэлтэстэй хамтран суралцагчиддаа лекц сургалт, нөлөөллийн ажил зохион байгууллаа.

     Энэхүү сургалтууд нь өсвөр насны хүүхдүүдийн сэтгэл зүйн онцлог, өөрийгөө ялан дийлэх, удирдах ур чадварт суралцах, үе тэнгийхэнтэйгээ болон нийгмийн харилцаанд оролцохдоо анхаарах асуудлуудын талаар мэдлэг мэдээлэл өгөх зорилготой.

1. СБД-ийн гэр бүл хүүхэд залуучуудын хөгжлийн хэлтсийн сэтгэлзүйч Б.Мөнхзаяа “Уур бухимдал стрессийг зохицуулах аргууд”, “Үерхэл нөхөрлөл ба хайр дурлал” гэсэн сонирхолтой сэдвүүдээр лекц ярилцлага өрнүүллээ. Эрдэмтдийн судалгаагаар байнгийн уур бухимдал, стресстэй байж удаан хугацаагаар бухимдлаа тайлахгүй байх нь зүрх судасны өвчтэй болох, ходоодны шархлаа өвчин үүсэх, гуурсан хоолойн багтраа, артерийн даралт ихсэлт, бүдүүн гэдэсний үрэвсэл, нейродермит /Арьсны өвчин/, бамбай булчирхайн дааврын ихсэлт, сэтгэцийн өвчтэй болох зэргээр хүний эрүүл мэндэд сөргөөр нөлөөлдөг болохыг нотолсон байна. Үүнээс хэрхэн сэргийлэх, уур бухимдал стрессийг хэрхэн зохицуулах аргуудыг суралцагчдад танилцууллаа. Мөн үерхэл нөхөрлөл нь хүн нийгэмд хүлээсэн үүргээ биелүүлж, эрхээ эдлэн амьдрахад нь тусалдаг. Үерхэл нь хүмүүсийн хамгийн нандин харилцааны нэг бөгөөд нэг нэгнийгээ таньж мэдэх, хайрлаж хүндлэх, хүлээн зөвшөөрөхийн зэрэгцээ бие биедээ итгэл хүлээлгэх зэргээр харилцан хамааралтай болгодгийг онцлон ярилаа. Түүнчлэн өсвөр насныхан дурлал, шохоорхлыг ялгадаггүйгээс амьдралдаа алдах, итгэлгүй болох, сэтгэлээр унах тохиолдол олон буйг сануулан дурлал нь удаан хугацааны харилцаа, ижилсэн дасах үндсэн дээр хөгждөг, шохоорхол бол гэнэтийн бөгөөд цочмог, үндэс суурь сул байдгаараа ялгаатайг ойлгуулан үерхэлдээ үнэнч байж ирээдүйд сайн хүн болохын тулд өөрийгөө болон найз нөхдөө сэтгэлзүйн хувьд сайн таних шаардлагатайг зөвОтгонтэнгэр их сургуулийн Хуульзүйн сургуулийн багш Н.Булгантамир “LIFE IS UNFAIR” сэдэвт лекцээрээ өөрийн амьдралын туршлагаа хуваалцлаа. Тэрээр сурагч байхдаа сурлагандаа төдийлөн сайн байгаагүйч сайн найзын нөлөөгөөр ярих, илтгэх, мэтгэлцэх ур чадварт суралцан улмаар Монголын мэтгэлцээний танхимаас зохион байгуулдаг мэтгэлцэх ур чадварын тэмцээнд 12 удаа оролцож 11 удаа тэргүүн байр эзэлсэн амжилт үзүүлжээ. Улмаар дэлхийн мэтгэлцээний тэмцээнүүдэд оролцоход англи хэлний мэдлэг хангалтгүй байсан учраас богино хугацаанд англи хэлийг хэрхэн амжилттай суралцсанаа сонирхуулан хүн өөрөө хичээвэл амжилтад хүрч чаддагийг өөрийн туршлагаасаа хуваалцсан нь суралцагчдын сонирхолыг татаж тэдэнд мэтгэлцэх ур чадварт суралцах, англи хэлийг шантрахгүй зорилго, төлөвлөгөөтэй суралцах сэдэл тэмүүллийг төрүүлсэн сонирхолтой, ач холбогдолтой ярилцлага боллоо.
2. СБД-ийн цагдаагийн нэгдүгээр хэлтэсийн хүүхдийн байцаагч Ө.Уянга “Гэмт хэрэг, зөрчлөөс урьдчилан сэргийлэх нь” сэдэвт лекцээр өсвөр насны хүүхдүүдийн нийтлэг холбогддог гэмт хэргийн талаар мэдээлэл өгч, хууль тогтоомжийг тайлбарлан таниулах, гэмт хэргээс хэрхэн өөрийгөө болон бусдыг урьдчилан сэргийлэх талаар сургалтыг амжилттай зохион байгууллаа. Сургалтаар:

• Зөв хандлага, зан үйл төлөвшүүлэх;
• Гэмт хэргээс урьдчилан сэргийлэх /хулгай, дээрэм, танхайрах гэмт хэрэг, мансууруулах бодисын хор хөнөөл/;
• Гэр бүлийн хүчирхийлэлд өртсөн хүүхдийг хэрхэн илрүүлэх, таних, туслах
• Зам тээврийн осол гэмтлээс урьдчилан сэргийлэх
• Цахим гэмт хэргээс урьдчилан сэргийлэх, эрсдэлээс хамгаалах
• Тамхины хяналтын тухай хууль, зөрчлийн тухай хуулийн өсвөр насны хүүхдүүдэд хамаарах хэсгийг танилцуулж, өсвөр насны хүүхдүүдийн тамхидалт, түүний хор уршиг зэргийг суралцагчдад таниулан мэдээлэл өгөв

       Суралцагчид лекцээс сонирхсон асуултаа асуухаас гадна зөрчлийн тухай хуулийн хэрэгжилтийн талаар, зөрчил гаргаж буй иргэнийг мэдүүлсэн тохиолдолд хэрхэн шагнал урамшуулал авах талаар тодруулан асууж харилцан үзэл бодлоо солилцов.

      Ийнхүү ШУТИС-ийн ахлах сургууль нь хүүхэд хөгжил, хүмүүжил, хүмүүнлэгийн хөтөлбөрийг хэрэгжүүлэн хүүхдийн хөгжил, хүмүүжил, төлөвшилд сөрөг нөлөө үзүүлж буй хүчин зүйлсийг тодорхойлон мэргэжлийн байгууллагуудтай хамтран хүүхдийг хамгаалах, тэдэнд эерэгээр нөлөөлөх, эерэг харилцаа хандлагыг бий болгох, суралцагчдад тулгамдсан асуудлуудаа хялбар аргаар шийдэх арга зүйд суралцуулахад анхааран ажиллаж байна. Энэ удаагийн сургалтууд энэүү зорилго зорилтоо хэрэгжүүлсэн ач холбогдолтой сургалт боллоо.  

ШУТИС-ИЙН ХАРЬЯА ЕРӨНХИЙ БОЛОВСРОЛЫН

АХЛАХ СУРГУУЛИЙН ЗАХИРГАА