СУДЛАГДАХУУНЫ АГУУЛГААР ИНТЕГРАЦЧИЛАГДСАН НЭГ СЭДЭВТ ХИЧЭЭЛИЙН УРАЛДААН

ШУТИС-ийн Ахлах сургуулийн багш нарын дунд амжилттай явагдлаа. Уралдаан үр дүнд суурилсан сургалтыг хөгжүүлэх, хичээл хоорондын нэгдмэл хөтөлбөрийг хэрэгжүүлэх замаар суралцагчдыг асуудал шийдвэрлэх, бүтээлч үйл ажиллагаанд суралцуулах зорилгыг дэвшүүлэн 3 үе шаттай явагдаж дүнгээ гаргалаа.

 Уралдааныг ШУТИС-ийн Сургалтын Бодлого зохицуулах газрын дарга, доктор Д.Гэрэлт-Од, Механик тээврийн сургуулийн эрдэмтэн, нарийн бичгийн дарга, доктор П.Аюурзана, Хэрэглээний Шинжлэх Ухааны сургуулийн Математикийн тэнхимийн профессор, доктор Д.Нямсүрэн нарын шүүгчдийн бүрэлдэхүүн дүгнэлээ.

 Энэхүү уралдаанд Зураг дизайны багш Э.Гансүх ахлагчтай багийн “Үр дүнд суурилсан MON-STREAM орчин үеийн нэгдмэл сургалтын аргаар богино хэмжээний хүүхэлдэйн кино хийж ахлах ангийн суралцагчдаар бүтээлгэх хөтөлбөр“ бүтээл 1-р байр, Физикийн багш О.Отгонбаяр ахлагчтай багийн “Ирээдүйн эко хот” сэдэвт бүтээл 2-р байр, Мэдээлэлзүйн багш Б.Баасантогтох ахлагчтай багийн “Роботик” бүтээл, Англи хэлний багш Д.Оюун ахлагчтай багийн “ШУТИС-ийн Ахлах сургуулийн элсэгчдэд зориулсан тараах материал, сурталчилгаанд зах зээлийн эрэлт хэрэгцээний онцлогийг тусгах нь” бүтээл 3-р байранд тус тус шалгарлаа.